केळी
बागेची सर्वसाधारण देखभाल
👉 बागा तणमुक्त ठेवाव्यात.
👉 जमिनीलगतची पाने कापून त्याची बागेबाहेर नेऊन योग्य विल्हेवाट लावावी.
👉 मुख्य खोडाशेजारी येणारी पिल्ले जमिनीलगत धारदार विळीने नियमित कापावीत.
👉 बागेत पाणी साचलेले असेल, तर अतिरिक्त पाणी बागेबाहेर काढावे. बाग नेहमी वाफसा स्थितीत ठेवावी. शिफारस केलेल्या वेळापत्रकानुसार पाणी द्यावे.
👉 मुख्य वाढीच्या अवस्थेतील मृगबागेस पाण्याद्वारे (फर्टिगेशन) ४.५ किलो युरिया, ६.५ किलो मोनो अमोनियम फॉस्फेट व ३ किलो म्युरेट ऑफ पोटॅश ही खते द्यावीत.
👉 मुख्य वाढीच्या अवस्थेतील मृगबागेस जमिनीतून खते देण्यासाठी ८२ ग्रॅम युरिया बांगडी पद्धतीने किंवा झाडाच्या दोन्ही बाजूंनी कोली घेवून खत द्यावे. खत दिल्यानंतर लगेच मातीआड करावे.
👉 नवी लागवड केलेल्या मृगबागेतील विषाणूजन्य झाडे मुळासकट उपटून नष्ट करावीत.
👉 केळी बागेभोवती सजीव कुंपण (शेवरी) वारा प्रतिरोधक म्हणून लावावे.
👉 केळी लागवडीनंतर दुसऱ्या व चौथ्या महिन्यात इडीटीए झिंक आणि इडीटीए फेरस यांची प्रत्येकी ०.०५ टक्के (१० लिटर पाण्यात ५ ग्रॅम) फवारणी करावी.
