खोडवा पीक घेताना काही बाबींचा विचार करणे आवश्यक आहे. सर्वसाधारणपणे १५ फेब्रुवारीपर्यंत तुटलेल्या उसाचाच खोडवा ठेवावा. त्यानंतर खोडवा घेतल्यास खोडकिडीचा प्रादुर्भाव मोठ्या प्रमाणावर होतो. ऑक्‍टोबर ते फेब्रुवारी या कालावधीत तुटलेल्या उसाचा खोडवा ठेवल्यास अधिक उत्पादन मिळते. तसेच आडसाली, पूर्वहंगामी व सुरू या हंगामातील लागणीचा ऊस तोडून त्याचा खोडवा ठेवल्यास पूर्वहंगामी उसापासून ठेवलेल्या खोडव्याचे उत्पादन अधिक मिळते. लागवडीच्या उसाचे उत्पादन एकरी ४० टन आणि ऊस संख्या एकरी ४०,००० पेक्षा जास्त असलेल्या उसाचाच खोडवा ठेवावा. पीक विरळ झाल्यास रोपे लावून नांग्या भराव्यात. खोडवा ठेवावयाची जमीन सुपीक आणि उत्तम निचऱ्याची असावी. खोडवा पीक हे हलक्‍या, कमी खोलीच्या तसेच निचरा न होणाऱ्या क्षारपड, चोपण जमिनीत घेऊ नये. खोडवा पीक १२ ते १४ महिने वयाचे असताना उसाची तोड होणार असेल, तरच खोडवा ठेवावा. शिफारशीत ऊस जातीचाच खोडवा ठेवावा. सपूर्ण खोडवा ऊस महितीसाठी हा विडिओ नक्की बघा
काणी व गवताळ वाढ या रोगांचा खोडवा उसातील प्रादुर्भाव टाळण्यासाठी, उष्ण बाष्फ प्रक्रिया केलेल्या त्रिस्तरीय बेणेमळ्यातील शुद्ध बेणे कार्बेंडाझिमची बेणेप्रक्रिया करून ऊस लागणीसाठी वापरावे. दर ३-४ वर्षांनी बेणे बदल करावा. खोडव्यामध्ये पाचटाचा आच्छादन म्हणून प्रभावीरीत्या वापर करण्यासाठीची पूर्वतयारी ऊस लागणीपासूनच करायला हवी. यासाठी ऊसाच्या दोन सऱ्यांमधील अंतर कमीत कमी १२० सें.मी. असावे किंवा जमिनीच्या मगदुरानुसार रुंद सरी अथवा जोडओळ पद्धतीने उसाची लागण करावी, म्हणजे पट्ट्यात पाचट चांगले बसते व फुट चांगली होते.
