- खोडवा ऊस
पीक संरक्षण
- खोडवा पिकामध्ये काणी व गवताळ वाढीचे प्रमाण जास्त आढळते. त्यासाठी अशी काणीग्रस्त बेट व गवताळ वाढीची बेटे समूळ उपटून नष्ट करावीत.
- मार्च-एप्रिलमध्ये तुटलेल्या ऊसाचा खोडवा ठेवल्यास खोडकिडीचा प्रादुर्भाव जास्त दिसतो. खोडवा ऊसामध्ये खोड किडीचा प्रादुर्भाव दिसून आल्यास, एकरी दोन ट्रायकोकार्डची दहा ते पंधरा दिवसांच्या अंतराने तीनवेळा प्रसारणे करावीत. क्लोरॲन्ट्रानिलीप्रोल (१८.५ एससी) ०.३७५ मि.लि. किंवा क्लोरपायरीफॉस (२० इसी) २ मि.लि. प्रति लिटर पाणी प्रमाणे फवारणी करावी. अन्यथा क्लोरॲन्ट्रानिलीप्रोल (०.४ जीआर) ७.५ किलो किंवा फिप्रोनिल (०.३ जीआर) १० किलो प्रति एकर प्रमाणे जमिनीत वाफसा असताना समप्रमाणात मिसळून द्यावे.
- हुमणीच्या नियंत्रणासाठी वळवाचा पहिला पाऊस झाल्यानंतर कडुनिंब, बाभूळ व बोर या झाडावरील भुंगेरे प्रकाश कंदील व रॉकेलचा वापर करून सामुदायिकरित्या रात्रीच्या वेळी गोळा करून नष्ट करावेत. हुमणीग्रस्त क्षेत्रात फिप्रोनिल (०.३ जीआर) ८ किलो प्रति एकर शेणखतात मिसळून द्यावे. नंतर हलके पाणी द्यावे.
- कांडी किडीच्या नियंत्रणासाठी एकरी दोन ट्रायकोकार्ड्स मोठ्या बांधणीनंतर दर पंधरा दिवसांनी आवश्यकतेनुसार ऊस तोडणीअगोदर एक महिन्यापर्यंत वापरावीत.
पूर्वहंगामी ऊस
पीक १२ ते १६ आठवड्याचे झाल्यास एकरी एकूण शिफारशीत खतमात्रेच्या १० टक्के नत्राची (१४ किलो) मात्रा ३० किलो नीमकोटेड युरिया या प्रमाणात द्यावी. पक्क्या भरणीयोग्य १६ ते २० आठवडे वयाच्या उसात आंतरपिके घेतली असल्यास त्यांची काढणी करावी. काढणीनंतर पहारीच्या साह्याने सरीचे वरंबे फोडून उर्वरित रासायनिक खतांची मात्रा प्रति एकरी ५५ किलो नत्र (११९ किलो युरिया), ३४ किलो स्फुरद (२१२ किलो सिंगल सुपर फॉस्फेट) आणि ३४ किलो पालाश (५६ किलो म्युरेट ऑफ पोटॅश) या प्रमाणात द्यावी. खतमात्रा एकत्र चांगली मिसळून सऱ्यांच्या संख्येत विभागून द्यावी. खते दिल्यानंतर रिजरने भरणी करावी व रानबांधणी करून लगेच पाणी द्यावे. को-८६०३२ ही जात अधिक उत्पादनक्षम असल्याने रासायनिक खतांच्या वाढीव मात्रेस प्रतिसाद देते. यासाठी खतमात्रा एकरी २५ टक्के जादा द्यावी.
कृषिक अॅप डाउनलोड करण्यासाठी खालील बटन वर क्लिक करा.
